تنهيدة كلمات

و في لحظة..كل شيء يوفى..في لحظة التصويرة المزيانة تكحال..تتخربش..و ممكن ياسر تتقطع..تحكم فيك كلمة..كلمة تفيّقك من حلمتك..تخرجك من جنتك..كلمة..تدخل في قلبك كالرصاصة..توجعك تجرحلك كنينك و تحلّك عينيك على حقيقة مرّة..حقيقة ماتخيّلتهاش حتى في منامتك .. ولاّ تخيّلتها ألف مرّة و في كل مرّة تزيد تخاف منها..و تكذب و تنسّي روحك اللي هي ينجم يجي نهار و تصير..وصارت…

بكلمة حياتك تتقلب..أو بالأحرى تولي غريبة عليك..تولّي غريب فيها..تخزرلها تقول غشّير و سيبوه في الأسواق نهار جمعة..يخزر باهت حاير مش عارف انا زنقة يختار و وين باش توصلو..للزيتونة ولا للكارتي..و انتي كيفو باهت تتفرج في حياتك الجديدة..بعد ماخرجت منها العزيزة عليك..و عليها..الانسانة اللي كانت محلّيتها و محييتّها..باهت مش عارف كيفاش تبدى نهارك..اش تعمل بسوايعك..حاجة عاديّة..كانت ماليتلك كل تركينة من تراكنك..ساكنتلك في كل تفصيلة من تفصيلاتك..ومازالت..و تحبّلك باش تبرى منها..باش تخرّج الروح اللي ساكنة فيك..و تحاول ترجع روحك منّها..و تبدى ملول الجديد..و تخزر للدنيا  غزرة جديدة…
تحبّلك باش تنساها..ولاّ خلّيني نقلّك..تتعوّد تعيش بلاش بيها..بعد ما فيروز و بنّتها تذكرك في القهوة اللي تترشفها كل يوم على
صوتهم لثنين..و كل نهج في تونس شاهد على ادّوليشاتكم و انتوما اليد في اليد و الضحكة عالخدّين و في العينين..خاصة في عينيها كي تجبد على لافايات و غرامها بيها.. مافمّاش حاجة في دنيتك على بساطتها ماتذكركش فيها..خاترها هي دنيتك..

هي من هاكة الناس اللي يدخلو لحياتك من غير مايدقو الباب..يبعثروها يقلبوها سافلها على عاليها..يزينوها يلونوها يخليوها تلمع كي عينيك و انتي تعشق في بوسة الخال اللي حذا شفايفهم..هاكة الناس اللي زايد تقعد تخمم كيفاش تنساهم خاترهم مايتنساوش..فقط تعوّد..تعوّد تكمّل بلاش بيهم…و ماتفكّرشي في الأحزان كيما قالك عمّك علي..غدوة نهار جديد…
3204359211_1_3_JxctugCL

Climensia.S

Publicités

One Comment

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s