كبرت

حلت عينها على صوت غريب.. على أمواج سبيكة شمس زارڨة… غزرتها عين بعين تڨلها  » راكي آثمة ». احتلت دار نجوم و ڨمرة و ما طرڨت الأبواب… سؤال جاء لبالها محيرها من الصغرة: « شكون جاء قبل الشمس و لا الڨمرة ؟ »… جاوبها على صوت الجلم شاڨ ثنيتو يجز في الصوف:« لا الشمس سابڨة للڨمرة و لا الڨمرة سابڨة للشمس، انت الشمس و نا الڨمرة نڨسمو الصوفات و همك همي و همي همك و حمل الجماعة ريش…»

جبدها خيال دخان هايم يجري في ثنية ريح هابة. تبعت الأصل. وصلت للمنبع وين يتجلى خيال مڨدود متعطر بريحة الورود… خيال مطبس على الشڨاء بوجه باسم… ايد لبره و ايد في النار في خاطر عيون جرادڨ لين تحمار…

حال الانسان كي حال هالجرادڨ، ما ينضج و ما يتعلم، كان ما يتألم، و يمشي على الجمرة و ما يتكلم، و يتجرح، و يصب على الجرح ملح و ما يسلم.. ما يرفض ليد اللي للخير تتمد و يكون وقت اللازم الظهرو السند…

ساكتة تتأمل في وجه ينور و يضوي و حبات عرڨ تلمع على أبواب السخانة، وجه صابر ماد عينو لسماء مغيمة تبشر بالغيث.

جبدتهم سبعة وخيات بديات مڨدودات و دهنتهم بزيتات الزويتينات و زينت بيهم أحلى اللمات…

هزت خبزتها « صغيرة و تحفونة كيفك » شمتها و كلتها على رذاذ مطر و ريحة تراب فاوحة حضنتها. غزرت للسماء «  وقتاش نكبر و نجم ندخل ايدي في النار؟ »

كبرت الطفلة و هجرتها خبزتها أما عمرها ما نست طيبة ريحتها…

هزار عباسي

Publicités

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s